Núna er kominn þriðji í jólum. Blessuð börnin, barnabörnin og tengdabörn eru horfin til síns heima eða þangað sem ástin býr. Að sjálfsögðu býr ástin á Árbraut 12 en það býr bara pínulítið meiri ást á þeim stað sem heimili manns er eða þar sem ástin í lífi manns býr. Þeir sem mjög vel þekkja síðuritara vita að hann hefur ritað jólabréf til ættingja og vina undanfarin einhver tuttugu ár hvar fram kemur það helsta sem drifið hefur á daga fjölskyldunar það ár sem við á. Til að nálgast þetta bréf er mjög einfalt að skilja eftir sig fingraför í gestabók þessarar síðu og bréfið verður sent um hæl. Gleðilega rest og ég hlakka til að sjá gömul og ný andlit á nýju ári. 

Helgin er um garð gengin og var viðburðarík svo ekki sé meira sagt. Haldið var upp á afmæli Einars Arnar án þess að hann hefði nokkurn grun um hvað í vændum var. Einnig var haldið upp á afmæli Margrétar Einarsdóttur yngri í Löngumýrinni. Mikael litli fékk sitt nafn sitt skráð í kristið samfélag og sá séra Jón Þorsteinsson um að skíra þetta yndislega barn. Ég er komin heim á Blönduós til þess að gera óþreyttur og hef þurft að elda tvo daga í röð ofan í sjálfan mig einfaldlega vegna þess að Magga er að heiman á námskeiði og kemur ekki heim fyrr en seint á fimmtudag. Ég sé fyrir mér eldamennsku og uppvask næstu þrjá daga en hugga mig við það að tengdamamma kemur heim úr Reykjavík á morgun og hef ég beðið Guð um að biðja hana að bjóða mér í mat a.m.k einu sinni ef ekki tvisvar. Á matseðlinum í kvöld var soðin ýsa með 7 kartöflum, rúgbrauði og ósviknu íslensku smjöri. Megi góður Guð halda verndarhendi yfir öllum mínu fólki og þá sérstaklega tengdamömmu sem eins og áður er getið kemur heim á Blönduós á morgun