Þessi dagur er svolítið sérstakur í mínum huga og hefur verið það undangengin 57 ár (eða eins lengi og ég man, látið ekki svona). Einhvern tíma í kringum þjóðhátíðardag Norðmanna árið 1951 fóru foreldrar mínir þau Sigurður Móses Þorsteinsson og Guðrún Ásta Jónsdóttir að huga að því að búa til dreng og létu verða af því. Reyndar segja mér kunnugir að foreldrar mínir hafi aldrei ætlað sér þetta en skipun hafi komið frá Hákoni 7. Noregskonungi til föður míns heitins þess efnis að þau hjón ættu að hefjast handa á þjóðhátíðardegi Norðmanna. Þessu til staðfestu þá sæmdi Ólafur 5. Noregskonungur sonur Hákons, föður minn orðu frá norsku krúnunni. Þetta þótti mér vænt um en þess má og geta að faðir minn fékk líka orður frá öðrum þjóðhöfðingum Norðurlandanna. 
    Það má kannski segja það að það sé nokkuð mikið í lagt að sæma heiðursmanninn hann föður minn orðum fyrir það eitt að hafa lagt í einn dreng fyrir tæpum 58 árum. Þessi hugsun er afar sjálfhverf og ég vil trúa henni en innst inni segir mér svo hugur að eitthvað annað og ef til vill meira hafi þarna legið að baki, en ég fæddist engu að síður þennan dag fyrir 57 árum.

    Þennan sama dag fyrir 57 árum var líka frumflutt í ríkisútvarpinu lag Sigfúsar Halldórssonar Litla flugan, lag sem lifað hefur með þjóðinni líkt og ég. Það sem greinir þarna á milli er að litla flugan hefur elst til muna betur og grun hef ég um það að talsvert fleiri þekki til hennar og þyki vænna um hana en mig "þó víða sé Jón þekktur" eins og einn ágætur nafni minn sagði fyrir margt löngu.

    Það hefur ýmislegt annað gerst þennan ágæta dag í gegnum tíðina og margir lands- og heimsþekktir menn hafa fæðst og komið við sögu þennan dag. Nægir að nefna að John Travolta, Stefán Jón Hafstein, Yoko Ono, Ferrari og Garry Neville eru öll fædd þennan dag. Ég rak líka augin í það í Morgunblaðinu í morgun að Ingibjörg Pálmadóttir á líka afmæli í dag. Af þessu má sjá að það er misjafn sauðurinn í þeirri hjörð sem kom í heiminn þann 18. febrúar.

    Margir merkir atburðir hafa líka gerst þennan dag og kýs ég með vilja að sneiða hjá að greina frá hörmungum og stórslysum sem dunið hafa yfir þjóðina þennan dag en minninguna um þá sem hlut eiga að máli geymi ég með mér.

    Einn af þeim atburðum sem ég gróf upp og tengjast 18. febrúar er reynsla kýrinnar Elm Farm Ollie en hún varð fyrsta kýrin sem flaug í flugvél og var mjólkuð í háloftunum. Þetta átti sér stað árið 1930 og veit ég ekki hver nytin var en eitt er víst að hún var hámjólkuð. Þennan dag árið 1959 varð Fidel Castro forsætisráðherra Kúbu en 413 árum fyrr dó Marteinn Lúther maðurinn sem ber ábyrgð á siðaskiptunum sem aftur leiddu til þess að nafni minn Arason var hálshöggvinn ásamt tveim sonum sínum í Skálholti 7. nóvember árið 1550.

    Af þessu sjá menn að þessi 49.dagur ársins er afar merkilegur fyrir margra hluta sakir og ekki síst fyrir það að brúa bilið á milli 17. og 19. febrúar ár hvert. Þeir sem fæðast þennan dag eru á síðasta "séns" með að verða vatnsberar því fiskar taka við daginn eftir.

    Svona til að ljúka umfjöllun um þennan 49. dag ársins þá er rétt að geta þess að síðast liðin átta ár hefur hitinn á hádegi á Blönduósi aðeins tvisvar farið undir frostmark en það voru árin 2002 og 2005 . Árin 2004 og í fyrra skera sig úr hvað hita varðar en 2004 fór hitinn í 10 gráður og í fyrra í 8 gráður. Árið 2009 bætist í hóp þeirra ára þar sem hitinn var vel yfir frostmarki í hádeginu.

    Ég fór í klippingu í morgun hjá henni Bryndísi og það fór eins og fyrri daginn og mig grunaði, ekki hin minnsta smuga til að kíkja í "Séð og heyrt". Reyndar leit ég eldsnöggt á eitt blaðið sem lá efst í blaðabunkanum meðan Bryndís renndi debitkortinu í gegnum lesarann og sá að Skari skrípó og Eva María eru skilin. Það var nefnilega það.

 
     Birtist ekki Rúnar þar sem ég stend í dyrunum og er að reyna að ná mynd af Jónmundi í Kambakoti og varð óvart fyrir linsunni og varð fórnarlamb sjálfur.

    http://www.huni.is/files/3/20090218204959588.pdf
Glugginn í dag. Hvað skal segja; slátursala, Domusgengið er með lífsmarki og áburðarverð komið fyrir almenningssjónir.

    Gammur frá Steinnesi verður á seinna gangmáli á svæðinu segir í auglýsingu frá samtökum hrossabænda. En við Rúnar finnum ekki auglýsinguna frá vinstri grænum þar sem sagt er frá Gammi á fyrra gangmáli en eins og allir vita þá líður senn að kosningum.

    Hrafnhildur blómadrotning hvetur karlana til að kaupa matjurtafræ handa einkonunum svo þær geti ræktað kál og rófur í sumar. Snjöll kona Hrafnhildur.

    Auglýsingin frá Samfylkingunni er stórbrotinn. Þar er auglýst eftir kjörgengum konum og körlum á framboðslista sem vinna samkvæmt bestu samvisku og eigin sannfæringu að hugsjónum jafnaðarstefnunar á Alþingi Íslendinga fyrir hönd íbúa Norðvestur kjördæmis og íslensku þjóðarinnar. Það munar ekki um minna.

    Skagastrandar-Rúnar er nokkuð góður núna í vísu vikunnar og nefnir til sögunnar framagrein, grein sem margir stefna á þessa dagana.

    Lítil kisa er í óskilum en ég veit ekkert um hana þó svo ég sé í guðatölu hjá auðnutitlingunum en það sakar ekki að spyrja E-listann um köttinn.

    Bolla, bolla segja Krúttararnir enda ekki seinna vænna því senn líður að bolludegi.

    Við Rúnar erum eins og klipptir út úr auglýsingu frá samfylkingunni og förum eftir eigin samvisku þegar við setjum Glugga vikunnar í ljóðrænt samhengi:

Um samfylkingu sagt margt er
þá sálnahjörð og frelsisher.
Á merar glaður Gammur fer
graður eins og vera ber.

Ps

Þess ber að geta að skáldkonan frá Löngumýri kom meðan við Rúnar vorum að rembast við að berja eitthvað "gáfulegt" saman og rukkuðum við hana um vísur. Ekki gat hún orðið við því á staðnum enda umhverfið lítt spennandi og því síður uppörvandi. Birgitta frá Syðri-Löngumýri brá á það ráð að hraða sér heim og yrkja í hvelli og hér koma "Vísur Löngumýrar Birgittu" og þarf ekki að taka það fram að gott þykir okkur hólið.

Hann Nonni gerði mér greiða
Svo glaður í sinni hann var.
En Rúnar var vísur að veiða
Og vesælan Glugga inn bar.

Í Ríkinu rækta þeir andann
og reyna að spæla frú.
Alveg sko allan fjandann
Þeir eru að skálda nú.  

Svo yrkir hann Rúnar rjóður
Og réttir svo vísu mér.
Og Nonni er næs og góður
Í nærmynd sem vera ber.

Ég ætla að auðga trúna
og ef til vill fer í geim.
Svo baka ég bollur núna
Og Birgitta er komin heim.

Þarf að muna þetta: Í ríkinu rækta þeir andann

http://www.huni.is/files/3/20090210200210510.pdf . Dettur nú ekki hann Rúnar inn úr harðindunum með fjölbragða Glugga í hönd. Fjölbragða! hvá menn en það er einmitt fjölbragðahátíð á Pottinum á föstudaginn og sagt frá því á forsíðu Gluggans. Við Rúnar söknuðum þess að ekki hafi verið auglýst fjölbragðaglíma en reyndar hefur það oft gerst eftir góðar hátíðir að menn efni til fjölbragðaglímu gersamlega óbeðnir.

    Tíminn æðir áfram. Í dag fer sólin að skína um kl hálf ellefu inn um gluggann til mín á skrifstofunni í Aðalgötunni. Það er ekki svo langt síðan að sólin skein bara ekki neitt inn um gluggann. Og hugsið ykkur, það eru ekki nema rétt um 2 mánuðir þar til fyrstu grágæsirnar fara að koma frá mr. Brown og félögum í Norðymbralandi. Þá getum við aftur farið að velta því fyrir okkur hvort gæsirnar skíti of mikið á almanna færi og hvort við eigum að láta það fara í taugarnar á okkur. Er þetta ekki allt saman skemmtilegt til að hugsa um , til að hlakka til. 
    Þegar maður leiðir hugann að því að maður er það sem maður hugsar eða hugsar ekki, þá kemst maður að því að lífið er svona upp og ofan eins og það hefur verið um tölvert langan tíma. Allavega eins lengi og ég man eftir. 
    Hvort sem það er réttlæti eða ekki þá byrjar sólin fyrr að skína á Dimmuborgir (hótelið) á morgnana. Fyrst fannst mér þetta ekki sanngjarnt en þegar ég fór að hugsa aðeins lengra þá komst ég að því að þörfin til að lýsa upp Dimmuborgir er meiri en að upplýsa mig. Svo einfallt er það nú.

    Mummi Haralds kom hér í morgun og tókum við spjall saman. Mumma var litið út um gluggann í átt til Dimmborga og spurði ; "Veistu hvað á að gera við hótelið?" "Ég hef heyrt að búið sé að ráða hótelstjóra" sagði ég en vissi bara ekki hvern né hvar ég heyrði það svo við felldum þetta tal niður. Mumma fannst mikið til snjókornanna koma sem svifu kyrrlát til jarðar og lögðust í samfelldri breiðu yfir gaddfreðna jörðina. "Það á einhver eftir að glepjast af þessu og detta flatur því menn átta sig ekki á hálkunni undir nýju mjöllinni" sagði ég. "Það þarf að kenna fólki að ganga í hálku" sagði Mummi. "Fólk á ekki að tipla á tánum heldur stíga vel í hælana þá dettur það ekki á hausinn" áréttaði Guðmundur Haraldsson af sinni alkunnu hæversku.

    Síðustu dagar hafa verið kaldir en bjartir og hefur sést vel yfir á Strandir. Þeir Nonni hundur og Stefán notfærðu sé þessa sýn á dögunum líkt og margir aðrir eins og hér má sjá.

http://www.huni.is/files/3/20090203184559713.pdf er slóðinn inn á Glugga vikunnar sem Rúnar kemur nú með inn úr fimmbulkuldanum

    "Ég hef tekið við störfum markvarðar í A-Hún. Jóhann Guðmundsson Holti" Það er alveg makalaust hvað eitt lítið a getur skipt miklu máli í samhengi hlutanna. Það sem við lásum og hér er ritað á undan stóð alls ekki í auglýsingunni þannig að það er ekkert mark á okkur Rúnari takandi. Það hefði nú samt verið svolítið svalt að Jói í Holti yrði markvörður fyrir alla sýslunna, núna þessu síðustu og verstu. Við yrðum ekki hissa þó margir yrðu hissa að sjá Jóhann verja mark Hvatar í annari deildinni í sumar.

    Auglýsingin frá 4x4 Húnvetningadeild er áhugaverð. Tappadekk og sjóða með rafgeymum er eitthvað sem við Rúnar þurfum að kynna okkur en peysukaup og þorrblót þekkjum við. Tappa dekk, hvað er nú það? Nagladekk, heilsársdekk og tappatogari er kunnuglegt. Kannski er þetta myndlíking , þannig að tappinn sé stytting á happatappa og dekkið sé eitthvað sem tengist dekki á skipi; samanber "hvað vilt þú upp á dekk" Semsagt hvað vill tappinn upp á dekk. Með öðrum orðum þá gæti orðið tappadekk verðið einhverkonar getnaðarvörn. En hvað vitum við Rúnar.

    "Pöbb Quiz" er nýjung hjá Pottinum og pönnunni. Spurningakeppni og verðlaun og einn kaldur fyrir þann sem hefur bjórspurninguna á hreinu. Hvað er tappadekk? GETNAÐARVÖRN! og maður hefur unnið einn kaldann.

    Maggi á Hnjúki ætlar að skondrast með alla þá sem séð hafa beljurass, suður í Borgarfjörð milli mjalta og messu, því opna á nautastöð á Hesti eftir nokkra daga. Nautastöð á hesti hváði maðurinn en hann vissi ekki um stóra stafinn.

    Ástæða er að minna á guðþjónustuna á sunnudaginn því við rákumst á Óskar í Meðalheimi tautandi fyrir munni sér þessa vísu:

Fjöldi manna finnst mér sé
farinn út af sporinu.
Ákallandi ESB
á undan Faðirvorinu.

    Ef einhverjir eru búnir að gleyma í hvaða röð hlutirnir eru þá er rétt fyrir þá að líta við hjá sóknarpresti á sunnudaginn og fá röðina á hreint.

    Að öðru leyti er Glugginn bara fínn. Hægt að teygja lopann og þæfa, prjóna, fara á reiðnámskeið og gera góð kaup í Kjalfelli.

    Ein bjórspurning: hvað er þrívíddarþæfing? Svar: þegar maður kemur heim af Quiz kvöldi og hefur svarað öllum bjórspurningum rétt en getur ekki alveg útskýrt það fyrir konunni . Maður teygir lopann og þæfir eins lengi og stætt er, eða er það ekki?

    Við Rúnar settum okkur í ljóðrænar stellingar til að höndla sem best visku okkar og uppgötvun með tappadekkið og hér sjáið þið árangurinn:

Allt og ekkert getur skeð,
ef menn eru með hrekki.
Tappadekkið takið með
svo tappinn leki ekki.