Höskuldur og 7,5 metrarnir

    "Skrifað var undir viljayfirlýsingu í gær á milli sveitarfélagsins Skagafjarðar, Lilju Pálmadóttur, Hofi á Höfðaströnd, og Steinunnar Jónsdóttur, Bæ á Höfðaströnd, um að þær Lilja og Steinunn færi íbúum Hofsóss og nágrennis 25 metra sundlaug að gjöf með tilheyrandi aðstöðu." Þetta las ég á Mbl.is núna áðan en Mbl hafði þetta úr Feyki.
    Alltaf leggst þeim eitthvað til í Skagafirði hugsaði ég öfundarlaust. Mikið væri það nú gott ef einhver svona sæmilega efnaður, þyrfti ekki að vera ríkur, gæfi okkur bæjarrbúum  svona eins og 7,5 metra langa sundlaug. Það er jú sú lengd sem vantar uppá að bæjarfélagið geti fært okkur 25 metra laug. Ég hefði verið kátur ef þessar ágætu konur hefðu gefið Hofsósbúum 17,5 metra laug og okkur 7,5 metra sundlaug en það er víst ekki boði.
    Reyndar kom Höskuldur köttur í heimsókn til okkar hjóna  í gær og nefndi sundlaugina ekki einu sinni á nafn. Allt hans látbragð var með þeim hætti að honum þætti örlítið vænt um okkur. Það gæti hugsast að hann hafi verið að þakka fyrir Möllu mús eða aðgengileg hreiðurstæði í garðnum okkar. Höskuldi var fylgt til dyra og sýnd fyllsta kurteisi þrátt fyrir að hann hafi komið óboðinn og það inn um svefnherbergisgluggann. Mikið déskoti öfunda ég Höskuld. Hann þarf ekki að velta fyrir sér misvitrum umræðum um nýtingu auðlinda eða lengd sundlaugar á Blönduósi. Hann fer bara sínar leiðir í náttúrunni óháður því hvaða skoðun menn hafa á því með hvað hætti fuglar og mýs deyja. Svona er þetta bara.