09.04.2007 21:33

Biskupinn og hátæknin

"Að áherslan á endalausar framfarir, sívaxandi auð og velsæld, mátt hins hrausta, sterka og stælta, er tál. Á móti kröfum hátækni og háhraða og hámörkun afkasta og ágóða, þarf að koma vægi alúðar og umhyggju fyrir lífinu, landinu, náunganum, ungviðinu veika og brothætta. Meistarinn, sem dó á krossi og reis af gröf, er frelsari heimsins, frelsari þinn." Um þessi orð hnaut ég í annars mjög svo þarfri ræðu biskups á páskadag. Þarna tengir hin mæti maður saman hátækni og háhraða við ágóða og nánast miskunarleysi hins sterka gagnvart hinum veikari. Þarna er farið út á hála braut í umræðu hins daglega lífs því þeir veiku sem eygja vonina í hátækninni finna ekki fyrir stuðningi við sína lífsbaráttu hjá þeim sem helst ættu að veita hann. Hér ég við þá mörgu einstaklinga sem glíma við margs konar sjúkdóma og eygja m.a. von í framförum hátækninnar svo sem stofnfrumurannsóknum. Hinir veiku þrá það heitast að lausn finnist á þeirra baráttumálum þannig að þeir geti orðið sterkir á ný og horft djarfir fram á veg. Það er ekkert samasemmerki á milli þess að vera ríkur og sterkur og veikur og umhyggjusamur. Það sem skiptir öllu máli er að vera maður og bera virðingu fyrir sjálfum sér og öðrum. Ég vil endalausar framfarir. Ég vil velsæld en það þarf ekki að þýða það að ég sé einhver skúrkur sem vaði yfir allt og alla. Lífið er í mínum huga " allt sem að þú villt að aðrir menn gjöri þér ,það sama skalt þú þeim gjöra." Vægi alúðar, og umhyggju fyrir lífinu, landinu, náunganum, ungviðinu veika og brothætta þarf ekki að bera neinn skaða af því að framfarir og velsæld aukist. Þetta voru góðir páskar og það eru mikil forréttindi að sjá vorið koma, lífið vakna í skini og skúrum í landi sem framfarir og velsæld ríkja að minnsta kosti enn.

Skrifað af Jón Sig

Tengill á færslu

Bæta við áliti

Sýna álit

09.04.2007 21:33

Biskupinn og hátæknin

Tenglar