Þrösturinn er kominn eftir langa fjarvist. Hann er farinn að syngja fyrir okkur á Árbrautinni 10 dögum seinna en hann á vana til. Vertu velkominn þröstur og þú hefur leitt með þér norður alla hettumávana sem koma vilja

    Dagurinn í dag er dagur sem maður aldrei gleymir. Dagurinn í dag er dagurinn sem Einar refaskytta var kvaddur frá Blönduóskirkju að viðstöddu fjölmenni. Þetta var dagur sem maður fann að sterk fjölskyldubönd yfirvinna alla hnúta og gera veröldina fagra. Þetta er dagur sem sorgin og gleðin eiga samleið og fyrir slíka daga ber hverjum og einum að þakka. Ég fékk að vera með, fyrir það þakka ég og veit að samfélagið okkar þakkar, lýtur höfði í virðingu og horfir  fram á veginn því þangað liggur leiðin. Einar er horfinn á braut en spor hans í jarðvegi samtímans eru óafturkræf og í því er eilífðin fólgin.